Posted by: மீராபாரதி | December 30, 2018

மீ டு : குற்றவாளிக் கூண்டிலிருந்தும் வெட்கத்திலிருந்தும் வெளியேறுதல்

மீ டு : குற்றவாளிக் கூண்டிலிருந்தும்

வெட்கத்திலிருந்தும் வெளியேறுதல்

Intersectionality  – me too vs I too

49125022_218201385750826_2318084786993758208_n#metoo மீ டு இயக்கம் ஒரளவு ஆண்கள் மனதில் பயத்தை கலக்கத்தை உண்டாக்கியுள்ளது என்றால் மிகையல்ல. இருப்பினும் ஆண்களும் தம்மை நியாயப்படுத்த தம் அதிகார மையங்களைப் பயன்படுத்தி பெண்கள் மீது வசைகளைப் பல வழிகளிலும் கோணங்களிலும் முன்வைத்துக் கொண்டே வருகின்றார்கள். இந்த ஆண்கள் மீ டு இயக்க பெண்கள் மீது முன்வைக்கும் முக்கிய குற்றச்சாட்டுக்கள், இவர்கள் மேட்டுக்குடியினர், தனி நபர்கள் மீதான தாக்குதல், பழிவாங்குதல் என்பதாகும். இது எந்தளவிற்கு சரியானது? இக் கூற்று சரியானது எனின் ஏன் அவ்வாறு நடைபெறுகின்றது? பல்வேறு வர்க்க சாதிய பிரிவுகளில் எந்தளவிற்கு இந்த இயக்கம் தாக்கம் செலுத்துகின்றது? என்பவற்றை அலசி ஆராய்வது பயனுள்ளது.

download (2)வரலாற்றில் பெரும்பாலான சமூகங்களில் பாலியல்ரீதியாக துஸ்பிரயோகம் அல்லது வன்புணர்வு என்பவற்றால் பாதிக்கப்பட்ட ஒவ்வொரு பெண்ணும் தமக்கு அவ்வாறு நடந்து என்பதை நினைத்து வெட்கித் தலைகுனிந்து மௌனமாகவே கடந்து செல்கின்றனர். கடந்து சென்றனர் என இனி எழுதலாம். எழுத வேண்டும். இதற்கு கலாசாரம், சமூக நம்பிக்கைகள், முன்முடிவுகள், எதிர்கால வாழ்வு என்பன காரணமாகின்றன. ஆகவே தமக்கு நடந்ததை வெளியே சொல்ல முடியாது தவிக்கின்றனர். அவ்வாறு சொன்னாலும் தம்மையே குற்றவாளிகளாக சமூகம் பார்க்கின்றது என உணர்கின்றனர். தம்மையே வெட்கித் தலைகுனிய வைக்கின்றனர். இது ஒரு மனவதை. வெளியே சொல்ல முடியாத வலி. இவ்வாறு எனக்கு மட்டும்தான் நிகழ்கின்றது என உணர்கின்றனர். இவ்வாறான வதையிலிருந்து வலியிலிருந்து இவர்களை மீட்டு எடுப்பதற்கு me too மீ டு என்ற சொல் உருவாக்கப்பட்டது. ஒரு ஆசிரியை தனது மாணவிக்கு நடந்த பாலியல் துஸ்பிரயோகத்தைக் கேட்டு நானும் இவ்வாறு (me too) பாதிக்கப்பட்டேன் என ஆறுதல் கூறி அவருக்கு மனதைரியத்தை வரவழைக்கின்றார். இதனால் தான் மட்டுமல்ல, தன்னைப் போல பாதிக்கப்பட்டவர்கள் பலர் இருக்கின்றனர் என உணர்ந்து மனதைரியத்தைப் பெறுகின்றார். இதன் தொடர்ச்சியாக பாதிக்கப்பட்ட பெண்கள் குறிப்பாக ஏற்கனவே குறிப்பிட்டபடி தாமாக உழைத்து சொந்தக் காலில் நிற்கின்ற பிரபல்யமான பெண்கள் தம்மை பாலியல் துஸ்பிரயோகம் செய்த வன்புணர்ந்த பிரபல்யமான ஆண்களை வெளிப்படுத்தினர். இத் தொடர் செயற்பாடு மீ டு இயக்கமாக உருவெடுத்தது.

imagesமீ டு இயக்கம் சுயமாக உழைக்கின்ற தமது சொந்தக் கால்களில் நிற்கின்ற பிரபல்யமான பெண்களினால்தான் ஒரு இயக்கமாக ஆரம்பித்து தொடர்கின்றது. தாம் பாதிக்கப்பட்டதை வெளிப்படுத்த இவர்களுக்கு இவர்களின் பிரபல்யமும் சொந்தக் காலிலில் நிற்கின்ற ஆற்றலும் பாதுகாப்பை வழங்கின. ஆனால் இவர்களின் பாதுகாப்பை மட்டுமல்ல வாழ்வையே அச்சுறுத்தும் வகையில் ஆணாதிக்க சமூகம் பலவகையான அச்சுறுத்தல்களை மேற்கொள்கின்றன. இந்தப் பெண்களுக்கே இவ்வாறான நிலை எனின் சதாரண மத்தியதர கீழ் வர்க்க உழைக்கும் பெண்களினதும் வீட்டிற்குள் வருமானமின்றி உழைக்கின்ற பெண்களினதும் சாதியால் ஒடுக்கப்படுகின்ற பெண்களினதும் நிலைகைளை நாம் உணர்ந்து புரிந்து கொள்ளலாம். கொள்ள வேண்டும். இருப்பினும் எந்தவிதமான சமூக பொருளாதாரப் பாதுகாப்பும் பிரபல்யமும் அற்ற இவர்கள் கூட தமது பாதுகாப்பைத் துறந்து வேலையைத் துறந்து வாழ்க்கையைத்துறந்து தம்மை பாலியல் ரீதியாக துஸ்பிரயோகம் அல்லது வன்புணர்வு செய்தவர்களை வெளிப்படுத்தியுள்ளார்கள். ஆனால் இவை பிரபல்யமாகவில்லை. அதேநேரம் இதற்காக இவர்கள் கொடுத்த விலை அதிகம். ஆகவேதான் இவ்வாறான சூழ்நிலைகளில் வாழும் பெண்கள் பெரும்பாலும் அமைதியாக இருக்கின்றனர். இதிலிருந்து இவர்களை மீட்பதற்கு பெரும் ஆதரவு பங்களிப்பு தேவைப்படுகின்றது.

images (6)ஆணாதிக்க, வர்க்க, சாதிய, தேசிய, இன, பால் ஒடுக்குமுறைகளால் பெண்கள் எவ்வாறு பாதிக்கப்படுகின்றனர் என்பதை தொகுதிகளாகப் பிரித்துப் பார்த்தோமானால் அவை எவ்வாறு இடைவெட்டுகின்றன என்பதை கண்டுகொள்ளலாம். நாம் வாழ்வது ஆணாதிக்க சமூகம். அவர்களின் கலாசாரம், பண்பாடுகள், சட்டதிட்டங்கள், அதிகாரங்கள் நடைமுறையில் இருக்கின்ற சமூகங்கள். இதைப் பாலியல் அடிப்படையில் இரண்டு தொகுதிகளாகப் பிரிக்கலாம். ஒரு தொகுதி ஆண்கள் மறுதொகுதி பெண்கள். பொதுவாக அனைத்துப் பெண்களும் எல்லா ஆண்களாலும் ஏதோ ஒருவகையில் சுரண்டப்பட்டு ஒடுக்கப்படுகின்றனர் என்றால் மிகையல்ல. பெரும்பான்மையானவர்கள் ஆண்களால் பாலியல் துஸ்பிரயோகத்திற்கு உள்ளாகின்றார்கள். ஆகவே இந்த இரண்டு தொகுதிகளும் ஒன்றை ஒன்று இடைவெட்டாது. ஆண்களின் தொகுதி ஒடுக்குகின்றவர்களாகவும் பெண்களின் தொகுதி ஒடுக்கப்படுகின்றவர்களாகவும் பிரிந்தே காணப்படும். சிலர் இவ்வாறு இல்லையென வாதிடுவார்கள். இதற்கு வர்க்க சாதிய ஒடுக்குமுறைகளை உதாரணம் காட்டுவார்கள்.

images (5)வர்க்க ரீதியாக பிரிக்கும் பொழுது சுரண்டும் வர்க்கம் சுரண்டப்படுகின்ற வர்க்கம் எனப் பிரித்தால் சுரண்டும் வர்க்கத்திலும் ஆண்களும் பெண்களும் வருவார்கள். இதேபோல் சுரண்டப்படுகின்ற வர்க்கத்திலும் ஆண்கள் பெண்கள் என இருபாலும் வருவார்கள். சுரண்டும் வர்க்கத்திலிருக்கின்ற பெண்கள் ஆதிக்கம் நிறைந்தவர்களாக சுரண்டப்படும் வர்க்க ஆண்களை சுரண்டுகின்றனர். இருப்பினும் இந்த இரண்டு தொகுதிகளுக்குள்ளும் உள்ள ஆண்களால் அத் தொகுதிகளுக்குள் இருக்கின்ற பெண்கள் சுரண்டப்படுகின்றனர். அதேநேரம் ஒடுக்கப்படுகின்றன சுரண்டப்படுகின்ற ஆண்கள் தமது ஆண் அதிகாரத்தைப் பயன்படுத்தி அதிகாரத்திலுள்ள தொகுதிப் பெண்களை பாலியல் துஸ்பிரயோகம் செய்வதற்கான சந்தர்ப்பத்தை பார்த்துக் கொண்டே இருப்பார்கள். ஆகக் குறைந்தது அவர்களைப் பற்றிய இழிவான பாலியல் கதைகளைப் பரப்பி வெட்கப்பட வைப்பார்கள். சிலநேரங்களில் பாலியல் துஸ்பிரயோகத்திற்கும் வன்புணர்வுக்கும் கூட உள்ளாக்கப்படுவார்கள். ஆகவே உயர் வர்க்க பெண்கள் ஒரு புறம் அதிகாரம் கொண்ட தொகுதிக்குள்ளும் மறுபுறம் ஒடுக்குமுறை பாலியல் துஸ்பிரயோகம் போன்ற தொகுதிகளுக்குள்ளும்  இடைவெட்டப்படுவார்கள். இந்தப் பெண்களுக்கே இவ்வாறன நிலை ஏற்படுமாயின் சுரண்டப்படுகின்ற தொகுதியைச் சேர்ந்த பெண்களுக்கு இரண்டு தொகுதியைச் சேர்ந்த ஆண்களாலும் பிரச்சனையை எதிர்கொள்ள வேண்டும். ஆகவே இங்கு மிகவும் ஒடுக்கப்படுகின்ற பெண்களாக வர்க்கத்தால் சுரண்டப்படுகின்ற பாலியல் அடிப்படையில் ஒடுக்கப்படுகின்ற பெண்கள் வருவார்கள். இவர்கள் அதிகாரமற்ற ஒடுக்குமுறையை எதிர்கொள்கின்ற பெண்கள் என்ற இடைவெட்டுக்குள் வருவார்கள்.

download (4)இதேபோல சாதிய அடிப்படையில் மனிதர்களைப் பிரித்தாலும் ஒடுக்கும் சாதியைச் சேர்ந்த பெண்கள் ஒடுக்கப்படுகின்ற சாதியைச் சேர்ந்த ஆண்களை இழிவு செய்கின்றனர். இங்கு பெண்களுக்கு சாதிய அதிகாரம் இருந்தபோதும் சில சந்தர்ப்பங்களில் ஆண்கள் என்பதால் அவர்கள் எந்த சாதியாக இருந்தாலும் இந்தப் பெண்கள் பாதிப்புக்கு உள்ளாகும் நிலை காணப்படுகின்றது. இங்கும் சாதிய அதிகாரம் கொண்ட பெண்கள் பாலியல் அடிப்படையில் இரண்டு தொகுதி ஆண்களாலும் பாதிக்கப்படும் சாத்தியம் இருக்கின்றது. அப்படியாயின் ஒடுக்கப்படுகின்ற சாதியைச் சேர்ந்த பெண்களின் நிலையை நினைத்துப் பாருங்கள். இதேபோல இனத் தேசியங்களால் ஒடுக்குகின்ற ஒடுக்கப்படுகின்ற தேசியங்களைச் சேர்ந்த பெண்கள் ஒடுக்குகின்றவர்களாகவும் ஒடுக்கப்படுகின்றவர்களாகவும் இருக்கின்றார்கள். அதேநேரம் தமக்குள்ளும் அவர்கள் ஒடுக்கப்படுகின்றார்கள். உதாரணமாக சிங்களப் பெண் ஒருவர் பெரும்பான்மை தேசிய இனமாக அதிகாரத்தைக் கொண்டிருப்பார். ஆனால் இவர் சிங்கள ஆண்களால் மட்டுமல்ல தமிழ் ஆண்களாலும் சுரண்டலுக்கும் வன்புணர்வுக்கும் உள்ளாகலாம். அதேநேரம் தமிழ் பெண்கள் இருபகுதி ஆண்களால் மட்டுமல்ல சிங்களப் பெண்களாலும் ஆதிக்கப் செய்யப்படும் நிலையே காணப்படுகின்றது.

downloadஇவற்றைத் தொகுத்துப் பார்த்தால் அதிகார வர்க்கத்தை ஆதிக்க சாதியைச் சேர்ந்த ஆண்கள் அதிக அதிகாரத்தை கொண்டிருக்கின்றார்கள். பெண்களின் நிலையோ குழப்பமானது. ஒரு புறம் அதிகாரமிக்க வர்க்கத்தையும் ஆதிக்க சாதியையும் சேர்ந்தவர்களாக இருப்பார்கள். ஆனால் பெண்ணாக ஒடுக்கப்படுவார்கள். அதிகார வர்க்கத்தை சேர்ந்தவர்களாக இருந்தபோதும் ஒடுக்கப்பட்ட சாதியைச் சேர்ந்தவர்களாக இருப்பார்கள். அப்பொழுதும் பெண்ணாக ஒடுக்கப்படுவார்கள். ஆதிக்க சாதியைச் சேர்ந்தவர்களாக இருப்பார்கள் ஆனால் கீழ் நிலை வர்க்கத்தை சேர்ந்தவர்களாக இருப்பார்கள். இவர்களும் பெண்ணாக ஒடுக்கப்படுவார்கள். இறுதியாக இவர்கள் எல்லோரையும் விட கீழ் வர்க்க ஒடுக்கப்படுகின்ற சாதியைச் சேர்ந்த பெண்களின் நிலையே மிகவும் கவலைக்கிடமானது.  இந்த சிக்கலை நாம் புரிந்து கொள்ளும் பொழுதே எப்பொழுதும் ஒடுக்கப்படும் மனிதர்கள் பக்கம் இருந்து நாம் போராட முடியும். அல்லது தவறான நிலைப்பாட்டிற்கே எம்மைக் கொண்டு செல்லும். மீ டு இயக்கத்திற்கு எதிரான பல முற்போக்கான ஆண்களின் எதிர்ப்பு நிலை இந்த சிக்கலைப் புரியாத நிலையிலையே ஆரம்பிக்கின்றது எனலாம்.

download (3)ஒரு பெண் அதிகார வர்க்கத்தில் ஒடுக்கும் சாதியில் பிரபல்யாமாக சொந்தக் காலில் இருப்பதால் மட்டும் அவளுக்குப் பெண்ணாகப் பாதுகாப்பான வாழ்க்கை கிடைப்பதில்லை என்பது யதார்த்தம். இதைத்தான் இன்றைய மீ டு இயக்கம் பெண்கள் எதிர்நோக்குகின்ற சவால்கள் தெரிவிக்கின்றன. இவர்களுக்கே இந்த நிலையெனில் வர்க்க சுரண்டலுக்கும் சாதிய ஒடுக்குமுறைக்கும் தேசிய அடக்குமுறைக்கும் உள்ளான பாலியல் அடிப்படையில் புறக்கணிக்கப்பட்டு ஒடுக்கப்படுகின்ற ஒரு பெண் எந்தளவுக்கு பாதிக்கப்படுவாள்? அவளுக்கு சமூகத்தில் எந்தளவு பாதுகாப்பு உள்ளது? இவ்வாறான ஒரு பெண் தனக்கு ஏற்பட்ட பாலியல் வன்புணர்வையல்ல துஸ்பிரயோகத்தைக் கூட சமூகத்தில் முன்வைக்கலாமா?

download (1)தமிழ் சமூகத்தில் எழுத்தாற்றலுள்ள பிரபல்யமான பெண் ஒருவர் தனது துணைவரை விட்டு காதலனுடன் வெளியேறினார். பின் காதலன் அவரை ஏமாற்றியபின் அப் பெண் கூறியதை யாரும் கேட்கவில்லை. அவருக்கு ஆதரவாக சிலரே இருந்தனர். ஏனெனில் அந்தக் காதலன் பிரபல்யமானவராக பலரது மதிப்பை பெற்றவராக இருக்கின்றார். அவர் மீது நம்பிக்கை கொண்டவர்களாக அவரைச் சுற்றியிருக்கின்ற ஆண்கள் மட்டுமல்ல பெண்களும் இருக்கின்றனர். இப் பெண் சொந்தமாக உழைத்தும் புலம் பெயர்ந்த நாட்டில் பாதுகாப்பாக வாழ்ந்தும் தனது காதலர் மீதான குற்றச் சாட்டை வெளிப்படையாக முன் வைக்க முடியவில்லை. முன்வைத்தாலும் ஏற்றுக் கொள்ளும் நிலையில் சமூகம் இல்லை. ஏனெனில் அவ்வாறுதான் நமது ஆணாதிக்க சமூகம் இருக்கின்றது.

download (1)வர்க்க ஒடுக்குமுறைக்கும் சுரண்டல்களுக்கும் எதிராகப் போராடுகின்ற ஆண்கள், சாதிய ஒடுக்குமுறைகளுக்கு எதிராகப் போராடுகின்ற ஆண்கள், தேசிய இன ஒடுக்குமுறைகளுக்கு எதிராகப் போராடுகின்ற பெரும்பான்மையான ஆண்கள் மீ டு இயக்கத்தை முன்னெடுக்கும் பெண்களுக்கு எதிராக இருக்கின்றனர். இங்கு இவர்களின் எந்தவிதமான நியாயப்பாடுகளும் நிபந்தனைகளும் சரியான பார்வையைத் தரப்போவதில்லை. மாறாக ஒவ்வொரு ஆண்களும் அறம் சார்ந்து தமது செயற்பாடுகளை சிந்தனைகளை அகம் நோக்கி பார்க்க வேண்டும். அப்பொழுது மட்டுமே தாம் யார்? எவ்வாறு சிந்திக்கின்றோம்? செயற்படுகின்றோம்? என்பதை உணரலாம். இதைச் சொல்வதற்கு காரணம் ஒரு ஆணாக நான் எப்படி சிந்திக்கின்றேன்? செயற்பட்டேன்? அல்லது செயற்பட உந்தப்படுகின்றேன்? என்பதை அறிவேன். இதற்கு நான் வளர்ந்த சமூகமும் அது என்னுள் விதைத்த சிந்தனைகளும் காரணமாக இருக்கலாம். அந்தவகையில் நானும் பெரும்பாலான ஆண்களும் இந்த சமூகத்தால் பாதிக்கப்பட்ட பழிக்கடாக்களே. ஆனால் இதை ஒரு சலுகையாக வாய்ப்பாக எடுத்துக் கொண்டு பெண்களுக்கு எதிரான செயற்பாடுகளை துஸ்பிரயோகங்களை நியாயப்படுத்துவது அநீதியாகும். மனித உரிமை மீறலாகும். அந்தவகையில் ஒரு ஆணாக பெண்கள் பாதிக்கப்பட நானும் (I too) காரணமாக இருக்கின்றேன் என்பதை ஏற்றுக் கொள்வதே அவர்களின் விடுதலையை நோக்கிய பாதையில் நாம் வைக்கும் முதல் அடியாக இருக்கும்.

images (1)குற்றச்சாட்டுகளை முன்வைக்கும் பாதிக்கப்பட்ட பெண்களை நோக்கி கேட்கப்படும் கேள்விகள் நியாயமற்றவை. தார்மீக அறமற்றவை. பத்திரிகையாளர்களாக வெட்கப்பட வேண்டிய கேள்விகள். இப் பெண்களுக்கு ஏற்பட்ட நிலை தமது தாய்க்கோ சகோதரிக்கோ துணைவிக்கோ ஏற்பட்டால் இந்தப் பத்திரிகையாளர்கள் எப்படியான கேள்விகளைக் கேட்பார்கள். அல்லது கேள்விகளே கேட்காமல் அமைதியாக இருப்பார்களா? அல்லது நீதி வேண்டி திடிர் புரட்சியாளர்களா மாறுவார்களா என்பதை ஒவ்வொருவரும் தமக்குள் கேட்க வேண்டும். உண்மையில் நேர்மையான பத்திரிகையாளர்கள் குற்றச்சாட்டை முன்வைக்கும் பெண்களை நோக்கி சூழ்ந்து நிற்க மாட்டார்கள். மாறாக இவர்களுக்கு ஆதரவாக யார் மீது குற்றம் சுமத்தப்பட்டதோ அவர்களை நோக்கியே படையெடுத்திருப்பார்கள். பாலியல் குற்றச்சாட்டுகள் தவிர்ந்த பிற குற்றச்சாட்டுகளில் இவ்வாறுதான் நடைபெறுகின்றன. ஆனால் இதில் மட்டும் விதிவிலக்கு. பெரும்பாலான பாலியல் துஸ்பிரயோக செயற்பாடுகள் பல நிறுவனங்களில் திறந்த வெளி இரகசியமாகவே இருக்கின்றது. ஒரு பெண் வேலைக்கு வரவில்லை எனில், உயர் நிலையிலிருந்து பெண் தீடிரென காணமால் போகின்றார் எனின் இதற்கான காரணங்களை பத்திரிகையாளர்கள் தேட வேண்டும். ஆனால் அவர்களுக்கு இதற்கான காரணங்கள் தெரியும். ஆம் இதற்கு காரணமான அதிகாரத்திலுள்ள பிரபல்யமான ஆண்களை இவர்கள் அணுக மாட்டார்கள். அவ்வாறு அணுகுவது தமது வேலைக்குப் பதவிக்கு ஆபத்து வந்துவிடும் நினைத்து அருகில் செல்லமாட்டார்கள். இவ்வாறான பத்திரிகையாளர்களைவிட தமது ஏற்படப்போகும் ஆபத்தைப் புறக்கணித்து வாழ்வையே நிர்க்கதிக்காக்கி குற்றவாளிகளை சமூகத்தின் முன் நிறுத்துகின்ற பெண்கள் அவர்கள் எந்த வர்க்கமாக சாதியாக இனமாக இருந்தால் என்ன அவர்கள் மேலானவர்கள். அவர்களுக்காக பெருமைப்படலாம். அவர்களுடன் எந்த நிபந்தனைகளுமின்றி தோழமையுடன் நிற்கலாம். நிற்க வேண்டும்.

ஒவ்வொரு ஆதிக்கத்திலும் உள்ளவர்கள் அதன் சலுகைகளை அதிகாரங்களை அனுபவிப்பவர்கள் தமது அதிகாரத்திற்கு துரோகம் செய்யாமல் தமது சலுகைகளைத் துறக்காமல், நாம் முழுமையான விடுதலையைப் பெற முடியாது. இங்கு துரோகம் என்பது நேர்மறையாகவே பார்க்கப்படுகின்றது. ஆதிக்க வர்க்கத்தினர் தமது வர்க்கத்திக்கு துரோகம் செய்ய வேண்டும். ஆதிக்க சாதியினர் தமது சாதிக்கு துரோகம் செய்ய வேண்டும். பெரும்பான்மை தேசிய இனவாதிகள் தமது இனத்திற்கு துரோகம் செய்ய வேண்டும். இதபோல ஆண்கள் தமது ஆணாதிக்கத்திற்கு துரோகம் செய்ய வேண்டும். அது தரும் சலுகைகளைத் துறக்க வேண்டும். இதுவே சமூக விடுதலை நோக்கிய நேர்மையான பயணமாகும். இதைச் செய்யாமல் பேசப்படும் அனைத்து விடுதலையும் சந்தர்ப்பவாதமே. பக்கச் சார்பானவையே. நேர்மையானவையல்ல. இந்த வகையில் மீ டு வை ஆதரிக்கின்ற ஒவ்வொரு ஆணும் ஆணாதிக்கத்திற்கு எதிராக குரல் கொடுக்கின்றான். தன்னுடன் இருக்கின்ற ஆதிக்கத்திற்கு துரோகம் செய்கின்றான். அது தரும் சலுகைகளை இழக்கின்றான். ஒடுக்கப்பட்ட பாதிக்கப்பட்ட மக்களுடன் ஒன்றாக நிற்கின்றான். இதுவே முழுமையான பெண் விடுதலை நோக்கிய பயணத்தில் சரியான பாதையாகும்.

மீராபாரதி
நன்றி தினக்குரல் மார்கழி 30, 2018

படங்கள் கூகுள்

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Categories

%d bloggers like this: