Posted by: மீராபாரதி | January 5, 2016

ஷோபாசக்தி – யாருடைய குரல்? – 1

நடிகை சோபாஷோபா என்றவுடன் இரண்டு மனிதர்களின் நினைவுகள் உடனடியாக வரும். முதலாவது தமிழ்த்திரைப்படங்களில் தனது நடிப்பாற்றலை வெளிப்படுத்தி முன்னணி கதாநாயகியாக இருந்தபோது தற்கொலை செய்து கொண்டதாக கூறப்படுகின்ற நடிகை ஷோபா. இரண்டாவது 1986ம் ஆண்டின் ஆரம்பத்தில் ஈபிஆர்எல்எவ் இயக்கத்தால் காரைநகர் இராணுவ முகாம் மீது மேற்கொள்ளப்பட்ட தாக்குதலின்போது உயிரிழந்த பெண் போராளி ஷோபா எனும் மதிவதனி. இவரே ஈழ விடுதலைப் போராட்டத்தில் களப்பலியான முதற் பெண் போராளி. பெண் போராளி சோபாஆனால் இன்று ஷோபா என கூகிலில் தேடினால் போராளி ஷோபாவைப் பற்றிய குறிப்புகளை காணக்கிடைப்பது அரிதாக இருக்கின்றது. நடிகை ஷோபாவைப் பற்றிய சில குறிப்புகள் வருகின்றன. முதலில் வருவதும் அதிகமாக வருவதும் ஷோபா சக்தி என்கின்ற புலம் பெயர்ந்த ஈழத்து எழுத்தாளரே.

images32000ம் ஆண்டிற்கு முதல் ஷோபாசக்தி எழுத ஆரம்பித்திருந்தாலும், தனது “கெரில்லா” நாவலின் மூலமாக பலரது கவனத்தையும் பெற்றார். அன்றிலிருந்து படிப்படியாக தனது பெயரை தமிழ் இலக்கிய மற்றும் அரசியல் உலகில் ஆழமாகப் பதித்து வருபவர் ஷோபாசக்தி. இன்று ஈழத்து இலக்கிய அரசியல் பரப்புகளையும் கடந்து உலகளவில் வெற்றிபெற்ற சினிமா நடிகனாக உலா வருகின்றார். அந்தோனிதாசன் என்கின்ற ஷோபாசக்தி தனது புனைப் பெயர் தொடர்பாக கூறிய பொழுது மேற்குறிப்பிட்ட இரண்டு பெயர்களையும் நினைவு கூர்ந்தார். ஈழத்தவர்கள் பலர் தனது புனைப் பெயர் பெண் போராளி ஷோபாவின் நினைவினால் வைக்கப்பட்டதா எனக் கேட்டதாகவும் கூறினார். ஆனால் நடிகை ஷோபாவின் நடிப்பினால் கவரப்பட்டு அவர் நினைவாகவே இப் புனைப் பெயரை வைத்ததாக குறிப்பிட்டார். இருப்பினும் ஷோபாசக்தியின் ஆழமான கனதியான படைப்புகளாலும் எழுத்துகளாலும் அவர் மட்டும் வாழவில்லை அவரது பெயரினுடாக போராளி ஷோபாவும் நடிகை ஷோபாவும் சக்தியாக வாழ்கின்றார்கள் என்றால் மிகையல்ல. இதற்காக ஷோபாசக்தி அவர்களுக்கு நாம் நன்றி கூற வேண்டும்.index1

ஷோபா இன்று உண்மையிலையே உலக நாயகன். இரண்டே இரண்டு படங்களில் நடித்திருந்தாலும் அதில் ஒரு திரைப்படமான தீபன் திரைப்படத்தின் பிரமாண்டமான வெற்றி அவ்வாறு அவரை உருவாக்கியுள்ளது. இதற்கு திரைப்பட உருவாக்கத்தில் பங்கெடுப்பவர்களின் கனவான கான்ஸ் திரைப்படவிழாவில் தீபன் திரைப்படம் வெற்றி பெற்றது முக்கியமான ஒரு காரணம் எனலாம். அவரை வெறுத்தவர்களும் தூற்றியவர்களும் துரோகியென்றவர்களும் இன்று வாழ்த்துவதுடன் மட்டுமல்ல அவருடன் நின்று படம் எடுப்பதை பெருமையாகவும் நினைக்கின்றார்கள். இத் திரைப்படத்தில் ஷோபா நடிக்கவில்லை. மாறாக ஈழத்திலிருந்து புலம் பெயர்ந்த (முன்னால்) போராளியாக வாழ்ந்திருக்கின்றார். ஏனெனில் அவரது இயல்பான உடல் மொழி என்னவோ அதையே நடிப்பாக குறிப்பிட்ட பாத்திரத்திற்காக வெளிப்படுத்தியிருக்கின்றார். ஒருவகையில் திரைப்பட பாத்திரமான தீபனும் அதை நடித்த ஷோபாவும் ஒருவரே எனலாம். ஆகவே அதிகமான நடிப்பு தேவைப்பட்டிருக்காது. இனி வேறுபட்ட திரைப்படங்களில் வித்தியாசனமான பாத்திரங்கைள ஏற்று நடிக்கும் பொழுதுதான் இவரது நடிப்பாற்றலைப் பற்றி பேசலாம். ஆகவே நாம் அவர் நடித்த திரைப்படம், அவரது பொக்ஸ் நாவல் மற்றும் அரசியல் தொடர்பாக சிறிது உரையாடுவோம்.

index2தீபன் திரைப்படம் தொடர்பாக பலருக்கு பல கேள்விகள் உள்ளன? ஷோபா இத் திரைப்படத்தில் நடித்திருக்கலாமா? இத் திரைப்படம் புலம் பெயர்ந்தவர்களுக்கு எதிரான திரைப்படமா? வெள்ளையினப் பார்வையில் எடுக்கப்பட்ட திரைப்படமா எனப் பல கேள்விகளை அவருடனான சந்திப்புகளில் முன்வைக்கப்பட்டன.

புலம் பெயர்ந்த ஒரு சமூகமாக இத் திரைப்படத்தில் நடிக்க சந்தர்ப்பம் வரும் பொழுது ஷோபா சக்தி நடித்திருக்கலாமா என்று என்னைக் கேள்வி கேட்டால் எந்தவிதமான தயக்கமுமில்லாமல் நடித்திருக்கலாம் எனக் கூறுவேன். ஏனெனில் இது ஒரு மிகப் பெரிய சந்தர்ப்பம். நல்ல வருவாய் தரும் தொழில். இத் துறையில் பல காலமாக இருக்கின்ற பலரின் நினைவேறாக் கனவு இது. ஆகவே இவ்வாறான ஒரு சந்தர்ப்பத்தை அவர் தவறவிடத் தேவையில்லை எனலாம். ஆனால் புலம் பெயர்ந்த நாடுகளில் வாழ்பவர்களும் ஒடுக்கப்படுகின்றவர்கள் சார்பான அரசியல் புரிதல்களும் நிலைப்பாடுகளும் கொண்டவர்களும் இது புலம் பெயர்ந்தவர்களுக்கு எதிரான இனவாதப் படம் ஆகவே நடித்திருக்க கூடாது என வாதிடுபவர்களும் உள்ளனர். இந்த வாதத்தில் ஒரு நியாயமும் உண்மையும் இருக்கலாம். ஆனால் இவ்வாறு வாதிடுபவர்கள் தமது நிலைகளை மறந்து விட்டே இவ்வாறான கேள்விகளை முன்வைக்கின்றனர்.

cannes%20refugees%201புலம்பெயர்ந்தவர்கள் மட்டுமல்ல தம் தம் நாடுகளில் வாழ்பவர்களும்  நமது நாளாந்த வருமானத்திற்காக, வாழ்க்கையை கொண்டு செல்வதற்காக ஏதோ ஒரு கம்பனியில் வேலை செய்கின்றோம். இந்தக் கம்பனிகள் எல்லாம் தொழிலாளர்களை ஏதோ ஒரு வகையில் சுரண்டுபவை. வெள்ளை அல்லது சமூகத்தின் ஆதிக்க கருத்துகளை கொண்டவை. தமக்குத் தெரிந்தும் தெரியாமலும் சமூக, சுற்றுச் சூழல், இன மத விரோத செயற்பாடுகளுக்கு பங்களிப்பவை. குறிப்பாக, இந்தக் கம்பனிகளைவிட, நாம் வாழ்கின்ற நாடுகளின் அரசுகளும் அரசாங்கங்களும் ஒன்றும் மேன்மையானவையல்ல. அவையும் வெள்ளையின மேலாதிக்க சிந்தனையை வெளிப்படுத்துபவை. “மூன்றாம் உலக நாடுகளுக்கு” எதிரான போர்களை பல வழிகளில் முன்னெடுப்பவை. இவ்வாறான சமூக விரோத செயற்பாடுகளை முன்னெடுக்கும் “பயங்கரவாத” அரசுகளின் கீழ் வாழ்ந்து கொண்டு அவர்களுக்கு வரியும் கட்டுகின்றோம். இவ்வாறு வாழும் நாம் ஷோபாவைப் பார்த்து அவ்வாறு ஒரு கேள்வியை கேட்பதற்கான தார்மீக அறத்தை இழந்தவர்களாகவே இருக்கின்றோம். ஆகவே அவரை நோக்கி முன்வைக்கப்படும் இவ்வாறான கேள்வி ஒரு வலுவற்ற கேள்வியே. இவ்வாறு கூறுவது எந்தவகையிலும் இத் திரைப்படத்தில் ஆதிக்கம் செலுத்தும் இயக்குனரின் கருத்தியல் தொடர்பாக உரையாடுவதை மறுப்பதாகாது. புலம் பெயர்ந்த நாடுகளில் வாழ்ந்து கொண்டு அந்த நாட்டின் அரசுகளையும் அரசாங்கங்களையும் நாம் விமர்சிக்கின்றோம் அல்லவா? இதுபோல இத் திரைப்படம் தொடர்பாக இன்னுமொரு தளத்தில் தவிர்க்கமுடியாது அவசியமாக உரையாட வேண்டியது என்பது உண்மையே. அவ்வாறுதான் நமது சமூகம் அரசியல் கருத்துநிலைகள் தொடர்பான புரிதலை மேலும் ஆழமாகவும் விரிவாகவும் வளர்த்துச் செல்லலாம்.images2

கனடாவில் மனவெளி கலையாற்றுக் குழுவின் அங்கத்தவர்களிலொருவரான செல்வன் அவர்கள் ஷோபாவுடனான சந்திப்பு ஒன்றை ஒழுங்கு செய்தார். இச் சந்திப்பில் நண்பர் ஒருவர் (தர்சன்) கலை மற்றும் இலக்கியத்துறையில் இடம்பெறும் அபகரிப்பு தொடர்பானதொரு கேள்விகளைக் கேட்டு சில கருத்துக்களையும் முன்வைத்திருந்தார்.

“பல்வேறுவகையான ஏற்றத்தாழ்வுகள் நிலவுகிற சமூகங்களில் ஒடுக்குகிற பிரஞ்சு வெள்ளையினச் சமூகத்தைச் சேர்ந்த ஒருவர் அதே சமூகத்தால் ஒடுக்குமுறைக்குள்ளாகுகிற சமூகமொன்றை மையமாக வைத்து ஒரு படைப்பை உருவாக்கும்போது அவர் கடைப்பிடிக்க வேண்டிய அறக் கோட்பாடுகள் எவை? இவ்வாறனதொரு படைப்பு முயற்சியில் ஈடுபடும்போது சோபா சக்தி எவ்வாறன அறக்கோட்பாடுகளைப் பின்பற்றுகின்றார்?” என்ற கேள்விகளை தர்சன் கேடிருந்தார்.

ஒடுக்கும் சமூகத்தை சேர்ந்தவர்களுக்கு தாம் விரும்பியதை சொல்வதற்கும் செய்வதற்கும் ஒடுக்கப்படுபவர்களுடன் ஒப்பிடும்போது பலவிதமான வசதிகளும் வாய்ப்புகளும் உள்ளன. இந்தச் சலுகைகளைக் கொண்டு இவர்கள் தம்மைப்பற்றிப் படங்கள் எடுப்பதில் பிரச்சனையில்லை. ஆனால் தம்மால் அல்லது தாம் சார்ந்த சமூகத்தால் ஒடுக்கப்படுகின்றவர்களைப் பற்றியும் இவர்களே படைப்புகளை உருவாக்கும் பொழுது அவை சிக்கலுக்குள்ளாகின்றன. கேள்விக்குள்ளாகின்றன. ஏனெனில் ஒடுக்குகின்ற சமூகத்தைச் சேர்ந்தவர்களின் கதைகள் என்று இவர்கள் நினைப்பவற்றை ஏன் சொல்ல முனைகிறார்கள்? என்ற கேள்வி.

இரண்டாவது தங்களொருபோதும் உணர்பூர்வமாக புரிந்து கொள்ளாத சமூகத்தை தமது படைப்பின் மையப் பொருளாக்கும்போது ஒடுக்குகின்ற சமூக்கங்களைச் சேர்ந்த படைப்பாளிகள் பெரும்பாலும் தங்களது பார்வைகளையினூடாக முன்வைக்கின்றனர். இது ஒருவகை அபகரிப்பாகும். ஒடுக்கபட்டவர்களின் வாழ்வை உணர்புபூர்மாய்ப் பெற்றிராதவர்கள் அவர்களது துன்பங்களுக்கு காரணமாயிருந்தத சமூகத்தைச் சேர்ந்தவர்கள் துன்புற்ற சமூகமொன்றை தமது கதையை சொல்லும்வரைக் காத்திருக்காது, அதற்கான வாய்ப்புகளை வழங்காது ஆனால் அவர்களது வாழ்க்கையென்று தாம் நினைத்தைச் சொல்வதென்பது மேலும் தம் ஆதிக்க நிலையை நிலைநாட்டுவதாகும். இவ்வாறன கருத்துக்களை கொண்டவகையில் தர்சனின் கருத்துகள் அமைத்திருந்தன.

ஆகவேதான் இவ்வாறான திரைப்படங்களும் அதன் இயக்குனர்களும் கடுமையான விமர்சனங்களை எதிர்நோக்குகின்றன(ர்). எதிர்நோக்க வேண்டும். இத் திரைப்படங்களின் கருத்தியல் தொடர்பான கேள்விகளைக் கேட்பது நமது உரிமை மட்டுமல்ல பொறுப்பும் கூட. இதன் அர்த்தம் ஒடுக்குபவர்களின் அல்லது ஒடுக்கும் சமூகத்தைச் சேர்ந்தவர்களின் படைக்கும் ஆற்றலையும் அதற்கான உரிமையையும் மறுப்பதல்ல. யாருக்கும் எதைப்பற்றியும் படைக்கும் உரிமை உள்ளது. அதேநேரம் இப் படைப்புகளை அக்குவேறு ஆணிவேராக விமர்சிக்கும் உரிமையும் ஒடுக்கப்படுவோருக்கும் (நமக்கும்) உள்ளது என்ற புரிதலும் இருக்க வேண்டும்.

thepan jackஒடுக்கும் சமூகத்தை சேர்ந்த ஒருவர் தம்மால் ஒடுக்கப்படுகின்றவர்களின் பிரச்சனைகளை மையமாக வைத்து ஒரு படைப்பை உருவாக்கலாமா? நிச்சயமாக உருவாக்கலாம். யாருக்கும் தாம் விரும்புகின்ற கதைக்களங்களை படைப்பாக்கும் உரிமை உள்ளது. ஆனால் இதனுடாக படைப்பாளரின் சமூக கண்ணோட்டதை நாம் அறிந்து கொள்ளலாம். ஏனெனில் படைப்பாளரின் சமூக மற்றும் அரசியல் நிலைப்பாடுகள் மற்றும் புரிதல்கள் என்பன அவரது படைப்பில் ஆழந்து காணப்படும். இது அவர் அறிந்தோ அறியாமலோ படைப்பு முழுவது பரவியும் வெளிப்படையாகவும் மறைமுகமாகவும் காணப்படும். இதுவே இப் படைப்பு யாருடைய குரல் என்பதைத் தீர்மானிக்க வழிவகுக்கும். ஆகவே அப் படைப்பு வெளிப்படுத்தும் கருத்தியல்கள் மற்றும் அரசியல் தொடர்பாக உரையாடும் உரிமை அதை வாசிப்பவர்களுக்கும் அல்லது பார்ப்பவர்களுக்கும் உண்டு. அந்தவகையில் இயக்குனர் ஜக்குஸ் ஓடியாட்டினால் (Jacques Audiard) உருவாக்கப்பட்ட தீபன் திரைப்படம் யாருடைய குரலாக ஒலிக்கின்றது என்பது நிச்சயமாக விவாதத்திற்கு உரிய ஒன்று.

தீபன் திரைப்படம் யாருடைய குரல் என்பது தொடர்பாக இரண்டு பதிவுகள் பிரான்சிலிருந்து வெளிவந்தன. ஒன்று வாசுதேவன் அவர்கள் எழுதியது. இதில் அவர் இத் திரைப்படம் பிரான்ஸ் அரசினதும் பெரும்பான்மை வெள்ளையின மக்களினதும் குரலாகவும் பார்வையாகவுமே இத் திரைப்படம் உள்ளது என்ற தொனிப்படக் கூறுகின்றார். மேலும் பிரான்ஸில் பொதுவாக ஆதிக்கம் செய்கின்ற கருத்தான, “குடிவரவாளர்கள் என்பவர்கள் வன்முறையாளர்கள் மற்றும் போதைவஸ்து பாவனையாளர்கள்” என்பதை இது மீளவும் உறுதிசெய்கின்றது. இவ்வாறு குடிவரவாளர்களுக்கு எதிரான போக்குகளை இத் திரைப்படம் தன்னுள் கொண்டுள்ளது என்கின்றார். அதவேளை பிரான்ஸ் அரசு குடிவரவாளர்களை பிரான்ஸின் சமூக கலாசார பொருளாதார கட்டமைப்புக்குள் உள்வாங்குவதற்கான செயற்பாடுகளில் அக்கறை கொள்வதில்லை என்பதையும் அதனால் ஏற்படும் ஆபத்துக்களையும் இயக்குனர் சுட்டிக்காட்டுவதாகவும் குறிப்பிடுகின்றார்.

மற்றய பதிவு சிவா சின்னப்பொடி அவர்களால் எழுதப்பட்டது. “பிரான்ஸ் அரசினால் புறநகர் பகுதிகளில் உருவாக்கப்பட்ட தொடர்மாடிக் கட்டிடங்களில் கள யதார்த்தத்தை இத் திரைப்படம் வெளிப்படுத்துகின்றது. இதனுடாக பிரான்ஸ் அரசின் போலி முகத்தை கட்டுடைக்கின்றது. குறிப்பாக பிரான்ஸிற்கு வரும் அகதிகளை பெரும்பான்மை சமூகத்துடன் ஒன்றினைக்காமல் ஒதுக்கி ஒரமாக வாழ வைக்கும் பிரான்ஸ் அரசின் அகதிகள் தொடர்பான இரட்டை நிலைப்பாட்டை சுட்டிக்காட்டுகின்றது” என்கின்றார். இறுதியாக அகதிகள் வன்முறை விரும்பிகள் அல்ல. அவர்களுக்கு உழைத்து நிம்மதியாக வாழ ஒரு வழி கிடைத்தால் அதையே தெரிவு செய்வார்கள் என்பதை திரைப்படத்தின் முடிவு சொல்கின்றது என்கின்றார் சிவா indexசின்னப்பொடி. இவ்வாறு இத் திரைப்படத்தின் பல்வேறு நேர் மற்றும் எதிர் மறையான அம்சங்களை இருவரும் சுட்டிக்காட்டுகின்றார்கள். (இருவரது முகநூலிலும் இப் பதிவுகள் காண்படுகின்றன). அதேவேளை ஷோபாசக்தி அவர்கள் இத் திரைப்படமானது பிரான்ஸின் புறநகர்ப் பகுதிகளில் திரையிடப்பட்டதுடன் இவர்களது வாழ்வில் (சில) மாற்றங்களை ஏற்படுத்த வழி செய்துள்ளதாகவும் முகநூல் குறிப்பொன்றில் பதிவு செய்துள்ளார். ஒரு புறம் இதுவே ஒரு படைப்பின் வெற்றியாகும் மறுபுறம் அதற்குள் இருக்கும் நுண் அரசியல் ஆய்வுக்கும் உரியது.
தொடரும்…
நன்றி தினக்குரல்
மார்கழி 27, 2015
தை 3, 2016

சோபா 1

படங்கள் கூகுள்.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: